مات . وأنا أفرح!!
"فقال لهم يسوع حينئذ علانية لعازر مات. و انا افرح لاجلكم اني لم اكن هناك لتؤمنوا و لكن لنذهب اليه. " يوحنا 11 : 14
بعتت
مريم ومرثا اخوات لعازر رسالة للمسيح بيقولولوا فيها. لعازر اللى انت
بتحبه عيان... وطبعا المفهوم من رسالة زى دى لما توصل للمسيح ان المطلوب
منه انه يجى بسرعة علشان يشفيه.
فالمسيح صنع الكتير من معجزات الشفاء وبالتأكيد محبته للعازر واسرته
هتخليه يجى على طول ويشفيه.
ده كان السيناريو المتوقع من اسرة لعازر وكمان من التلاميذ.
لكن المسيح كان عنده سيناريو تانى
لما المسيح سمع الرسالة دى بدل ما يروح قوام لبيت مريم ومرثا قعد فى
المكان اللى كان فيه يومين
وبعدين ابتدا يقول لتلاميذه لعازر نام وانا هاروح اصحيه
التلاميذ افتكروا انه كان بيتكلم عن نوم عادى ، لكن فى الحقيقة المسيح كان
بيقول لهم انه مات واتدفن
لكن الاعجب من كده انه قال لهم "لعازر مات .وانا افرح لاجلكم".
وهنا يجي السؤال ازاى لعازر حبيبك يموت وانت تفرح من اجل التلاميذ؟
الاجابة واضحة فى باقى الكلام وباقى القصة
فالمسيح قال لتلاميذه "وانا افرح لاجلكم انى لم اكن هناك لتؤمنوا"
يعنى المسيح كان عارف هو بيعمل ايه. كان قاصد انه يستنى لعازر لما يموت
لأن المرة دى هو مش ناوى يشفيه لكنه ناوى يقومه من الاموات. ويعمل المعجزة
دى قدام تلاميذه علشان يؤمنوا باللى قال عن نفسه انا هو القيامة والحياة.
مش الكلام ده بيفكرك بالحاجات اللى انت يمكن تكون بتصلى لها لكن بتلاقى ان
عكسها هو اللى بيحصل.
من الاخر كده، ربنا ليه قصد فى كل حاجة بيعملها.
وعلينا ان احنا نصدقه ونأمن بيه مش بس بسبب معجزاته واعماله، لكن بسبب شخصه
العظيم الحكيم القدير اللى بيعرف الافضل والاصلح لي وليك
123
| احدث تأمل | التأمل التالى | التأمل السابق | أقدم تأمل |
